Туркияда дунёдаги энг узун осма кўприк ишга тушди
Мазкур кўприк йилига 415 миллион евро даромад келтириши кўзда тутилган.
Туркияда Осиё ва Европа қитъасини бир-бирига боғлайдиган “Чаноққалъа 1915” осма кўприги ишга туширилди. Унинг очилиш маросимида Президент Ражаб Тоййиб Эрдоған иштирок этди.
“Туркия ўрта масофа бўйича дунёдаги энг узун кўприкка эга бўлган Японияни ортда қолдирди ва бу соҳада биринчи ўринни эгаллади. Айтмоқчиманки, ўрта оралиқ узунлиги бўйича дунёдаги энг узун 10 та кўприкдан 3 таси бизнинг мамлакатимизда”, — деди очилиш маросида нутқ сўзлаган Эрдоған.
“Анадолу” агентлиги маълумотларига кўра, марказий оралиқни ушлаб турувчи кўприк устунларининг баландлиги 300 метрдан ошади. Кўприк узунлиги 3,7 километрни ташкил этади ва Малкара-Чаноққалъа автомобил йўлининг 101-километрининг муҳим бўғинига айланиши кутилмоқда. Устунларнинг туташган жойлари ва кўприк элементлари Туркия байроғи ранглари бўлган қизил ва оқ рангга бўялган.
Дарданел бўғози бўйлаб олти полосали (ҳар бир йўналишда учтадан) осма кўприкнинг умумий узунлиги 4608 метрга етади.
Мазкур кўприк ўлчамларининг бир қатор рамзий маънолари бор. Кўприкнинг 2,23 метрлик ўрта қисми Туркия Республиканинг 100 йиллигини, 318 метрлик пўлат миноралари эса Чаноққалъа денгиз ғалабаси, яъни 1915 йил 18 март кунидаги Чаноққалъа зафарини англатади. Ўрта оралиғи 2023 метр эканлиги, бу ўз ўзидан 2023 йилга ишора қилмоқда.
Мамлакат раҳбари кўприкдан фойдаланиш бир ҳафта мобайнида текин бўлишини билдириб ўтди. Кейин эса бир марта фойдаланиш 200 тл бўлиши билдирилди.
