“Даврбанк” қонунни бузгани учун жаримага тортилди
Маълум қилинишича, фуқаролар карталаридаги пул маблағларининг ноқонуний ечилиши бўйича шикоят қилган.
Марказий банкнинг хабар қилишича, фуқаролардан банк картасидаги пул маблағларини уларнинг рухсатисиз ечиб олиниши ҳолати бўйича мурожаат келиб тушган.
Мурожаатлар ўрганилганда кафил ёки биргаликда қарз олувчи ҳисобланмаган фуқароларнинг банк карталари қонун ҳужжатларига риоя қилинмаган ҳолда уларнинг розилигисиз тижорат банки томонидан жисмоний шахсларга ажратилган кредит қарздорлигини сўндириш учун бириктирилиб, маблағлар ечиб олиш амалиёти йўлга қўйилганлиги аниқланган.
Бундай амалиётни йўлга қўйган “Даврбанк”ка нисбатан белгиланган тартибда жарима санкцияси қўлланилган. Шунингдек, банкка фуқароларнинг банк ҳисобварақларидан (шу жумладан, банк карталаридан) маблағларни қонунчиликка зид равишда уларнинг розилигисиз ҳисобдан чиқариш амалиётига чек қўйиш ҳамда фуқаролардан шу мазмунда шикоятлар келиб тушганда ушбу маблағларни қайтариб берилишини таъминлаш вазифалари юклатилган.
“Шу ўринда барча тижорат банкларига “Банклар ва банк фаолияти тўғрисида”ги Қонуннинг 57-моддасида банк хизматлари истеъмолчиларининг ҳуқуқлари ва қонуний манфаатлари бузилганлиги учун банкка нисбатан чоралар кўрилиши белгиланганлигини эслатиб ўтиш жоиз”, дейилади Марказий банк хабарида.
