“Толибон” билан Покистон муносабатлари таранглашмоқда
Покистон Афғонистоннинг икки вилоятига ҳаводан ҳужум уюштирган.
Покистон томонидан Афғонистоннинг Хост ва Кунар вилоятларига қилинган сўнгги ҳаво ҳужумларида камида 47 киши ҳалок бўлди. Бу ҳақда “Толибон” вакиллари маълум қилди.
“Покистон кучларининг ҳаво рейдлари оқибатида Хостда 41 нафар тинч аҳоли, асосан, аёллар ва болалар ҳалок бўлди. Бундан ташқари, 22 нафар аҳоли яраланган”, — дея маълумот берган вилоят ҳукумати вакили.
Яна бир афғон расмийси маълум қилишича, рейдлар Кунар вилоятида яна олти кишининг ўлимига сабаб бўлган.
Аввалроқ юқорида тилга олинган вилоятларга Исломобод томонидан бир қатор ҳаво зарбалари берилгани хабар қилинганди.
“Ал Арабия” телеканали маълумотларига кўра, ҳаво зарбалари Афғонистон билан чегарадаги Шимолий Вазиристонга пистирма уюштирган террорчилар қўлида етти покистонлик аскар ҳалок бўлганига жавоб бўлиши мумкин.
Кейинроқ Покистоннинг Кобулдаги элчиси ҳаво ҳужумлари муносабати билан “Толибон” муваққат ҳукумати Ташқи ишлар вазирлигига чақирилган. Томонлар учрашувида “Толибон” вакиллари Исломобод томонидан содир этилган бундай ҳужумлар фактини қоралаган.
