БМТ Сурияга гуманитар ёрдам етказди
Мамлакатда 2011 йилдан буён уруш тўхтагани йўқ.
БМТ Сурияга 73 та юк автомобилида гуманитар ёрдам жўнатди. Бу ҳақда "Anadolu" агентлиги хабар берди. Ушбу ёрдам карвони Туркия орқали олиб ўтилган. Унинг Идлиб аҳолиси учун мўлжаллангани айтилмоқда.
Идлиб Сурия ҳукумат кучлари ва қуролли мухолифат ҳамда турли радикал гуруҳлар ўртасида жанговар ҳаракатлар олиб борилаётган сўнгги йирик шаҳар бўлиб қолмоқда. Расмий Дамашқни Россия кучлари, Идлибдаги айрим гуруҳларни Туркия қўллаб-қувватлайди. Идлибда ўта оғир гуманитар вазият шаклланган.
Сурияда 2011 йилдан буён фуқаролар уруши тинмаяпти. БМТ маълумотларига кўра, қуролли низо оқибатида 400 минг киши ҳалок бўлган. 10 миллиондан ортиқ суриялик ўз уйларини ташлаб кетди. Уларнинг 4.8 миллиони хорижий давлатлардан бошпана топди.
Аввалроқ Ироқ Сурия билан чегарада девор қуриши тўғрисида хабар берилганди.
