Хоразмда истеъмол учун яроқсиз гўшт аниқланди
Жами 150 кг маҳсулот ёқиб йўқ қилинган.
Хоразмда истеъмолга яроқсиз гўшт маҳсулотларини ортиб кетаётган автомашина аниқланди. Бу ҳақда Ички ишлар вазирлиги Жамоат хавфсизлиги департаменти хабар берди.
Қайд этилишича, Урганч туманидаги “Чолиш” блок-постида “Элликқалъа–Урганч” йўналиши бўйлаб ҳаракатланиб келаётган “Некcия” русумли автомашина тўхтатилган. Транспорт воситаси текширилганда унинг юкхонаси ва салон қисмидан жами 150 кг гўшт маҳсулотлари санитария қоидаларига зид равишда олиб кетилаётгани аниқланган.
Вилоят ветеринария ва чорвачиликни ривожлантириш бошқармаси ходимлари томонидан ушбу гўшт маҳсулотлари истеъмол учун яроқсиз деб топилиб, ёқиш йўли билан йўқ қилинган.
Ҳолат юзасидан фуқарога нисбатан Маъмурий жавобгарлик тўғрисидаги кодекснинг 109-моддаси билан баённома расмийлаштирилган.
