АҚШнинг Сурияга қарши санкциялари муддати узайтирилди
Расмий Дамашқ Вашингтон миллий хавфсизлиги учун таҳдид сифатида баҳоланган.
АҚШ президенти Жозеф Байден Сурияга қарши санкцияларни бир йилга узайтирди. Бу ҳақда Оқ уй хабар тарқатди.
Гап 2004 йилдан 2012 йилга қадар Вашингтон томонидан жорий этилган чекловлар ҳақида кетмоқда. Бу санкциялар айрим юридик ва жисмоний шахсларнинг АҚШ ҳудудида жойлашган мулкларини блоклашни, шунингдек, айрим товар ва хизматларни Сурияга экспорт қилишни тақиқлайди.
Оқ уй тарқатган ҳужжатда Сурия ҳукумати ҳаракатлари Қўшма Штатлар ташқи сиёсати, иқтисодиёти ва миллий хавфсизлигига таҳдид сифатида баҳоланган. Байден администрацияси фикрича, Дамашқ зўравонлик ва инсон ҳуқуқлари бузилишига йўл қўймоқда.
Аввалроқ Ироқ Сурия билан чегарада девор қуриши маълум бўлганди.
