Хоразмда безорилар гуруҳи ушланди
Улар ўзга шахсларни уриб-дўппослаб келишган.
Хоразм вилоятида жамиятда юриш-туриш қоидаларини қасддан менсимасдан, ўзга шахсларни уриш-дўппослаш каби жиноятларни содир қилиб келган безорилар гуруҳи қўлга олинди. Бу ҳақда вилоят ИИБ ахборот хизмати хабар берди.
Аниқланишича, мазкур гуруҳга Урганч шаҳрида яшовчи, 1986-йилда туғилган ва муқаддам судланган С.Х. бошчилик қилган.
Ҳозирда Ўзбекистон Республикаси Жиноят кодексининг 277-моддаси 3-қисми билан қўзғатилган жиноят иши доирасида С.Х. билан биргаликда Урганч шаҳрида яшовчи, 1992-йилда туғилган Б.Э. ва Урганч туманида яшовчи, 1986-йилда туғилган О.М. ҳам гумонланувчи тариқасида жалб этилиб, процессуал тартибда ушланган.
Гумонланувчиларга тегишли автомашиналардан уриш ва тан жароҳати етказишда фойдаланиладиган пичоқ, темир бита ашёвий далил тариқасида олинган.
“Тергов ҳаракати давомида ушбу шахслар томонидан илгари содир қилинган жиноятларни ва уларнинг бошқа жиноий шерикларини аниқлашга ҳам эътибор қаратилади”, — дейилади хабарда.
