Интерпол: Украинадаги қуроллар бутун дунёга тарқалиб кетиши мумкин
Ҳозирнинг ўзида Европадаги жиноий тўдалар бунга ҳаракат қилаётгани маълум бўлди.
Интерпол бош котиби Юрген Шток Киевга етказиб берилган қуролларнинг Европадаги жиноий тўдалар қўлига тушиб қолишидан хавотир билдирди.
“Ушбу низода катта миқдорда қуроллардан фойдаланилаётгани, низо якунлангандан сўнг унинг ноқонуний тарқалиб кетишига олиб келади”, — деб огоҳлантирган бош котиб.
Унинг қўшимча қилишича, жиноий тўдалар ҳозирнинг ўзида ушбу қуролларга “кўз олайтирмоқда”. Унинг асосий ноқонуний тарқалиши ҳудуди Евроиттифоқ бўлади. Сабаби – Европада, айниқса, Скандинавия давлатлари қора бозорларида қурол нархи жуда баланд. Штокнинг сўзларига кўра, ҳатто оғир қуроллар ҳам савдога чиқарилиши мумкин.
“Жиноятчилар халқаро даражада иш олиб боради. Шу сабабли қуроллар турли қитъаларга тарқалади”, – деб қайд этган Интерпол вакили.
Аввалроқ Украина ташқи ишлар вазири Дмитрий Кулеба Киевга ҳамон қурол етишмаётганини айтганди.
