Хоразмда Миллий гвардия ходимлари бозорчиларга куч ишлатгани айтилди
Ҳолат бўйича ҳокимлик расмий муносабат билдирди.
Ижтимоий тармоқда Хоразм вилояти Урганч дехқон бозорида 4 июнь куни Миллий гвардия ходимлари она ва қизга куч ишлатиб, уриб олиб кетгани ҳақида видеолавҳа тарқалди. Ҳолат юзасидан шаҳар ҳокимлиги расмий муносабат билдирди.
Аниқланишича, шу куни дехқон бозори ёнидаги 5 блок савдо расталари олдида фуқаро М. Р. ва А. Ж. лар ўртасида жанжал юзага келган. Уни эшитган Миллий гвардия ҳарбий хизматчилари тезда воқеа жойига етиб борган. Миллий гвардия хизматчилари жанжални олдини олиб, фуқаро М. Р. ни воқеа жойидан кетказаётганда фуқаро А. Ж. ва унинг опаси Р. Ж. ларнинг жаҳли чиққан ва ходимларга бақириб, уларни ҳақорат қилган.
Шундан сўнг ушбу фуқароларни тинчлантириш мақсадида бозор ҳудудидаги 16-сонли таянч пунктига олиб келинган. Бу ерда ўзига нисбатан куч ишлатилганидан норози бўлган фуқаролар А. Ж. ва Р. Ж. лар Миллий гвардия ҳарбий хизматчиларига фаол қаршилик кўрсатиб, шовқин кўтарган ва ҳолатни ўзларининг қўл телефонига тасвирга олиб, интернет ижтимоий тармоқларига тарқатган.
Дастдабки текширув маълумотларига кўра, ушбу фуқароларга Миллий гвардия ҳарбий хизматчилари томонидан тан жароҳати етказиш ҳолатлари аниқланмаган.
Ҳозирда мазкур ҳолат юзасидан Миллий гвардия Хоразм вилояти бўйича бошқармаси ходимлари томонидан терговга қадар текширув ишлари олиб борилмоқда.
