Қашқадарёда келин эри ва унинг яқинлари томонидан "самосуд" қилинди

 

Маълум бўлишича, ушбу воқеа Яккабоғ тумани Янгиобод қишлоғи Каттабой Аширов жамоа хўжалигига қарашли ерда содир бўлган. Бизга хабар берган манбанинг айтишича, опа-ука ва тўрт нафар эркак ўртасидаги можаро катта жанжалга айланиб кетган. 

 

Шундан сўнг, опа-укани боғлаб қўйиб, мажбурлаб сочини олиб, навбати билан қамчи билан савалаб, калтак билан баданларига оғир тан жароҳати етказишган. Бундан ташқари улар вояга етмаган 7 ёшли қизни ҳам қамчи билан савалашган.  

 

Ҳолат юзасидан вилоят ИИБ маълумот берди. 

 

Маълум бўлишича, 9 июль куни соат тахминан 23:30ларда Яккабоғ тумани "Янгиҳаёт" МФЙда яшовчи фуқаролар Ю.Э., Ю.Б, Ю.Р. ва Ю.Х.лар  Яккабоғ тумани "Янгиҳаёт" МФЙда яшовчи Қ.М. фуқаро Ю.Х. билан ишқий муносабатда бўлиб юрганидан ғазабланиб, уни «самосуд» қилишган. 

 

Аёлнинг оёқ-қўлини боғлаб, сочини кесиб ташлаб, танасини дуч келган соҳаларига қамчи билан муттасил равишда уриб, қийнаб, жисмоний азоб бериб, тан жароҳати етказишган. 

 

Натижада Қ.М. тан жароҳати олиб, Яккабоғ тумани Тиббиёт бирлашмаси шифохонасига тушган.

 

Мазкур ҳолат юзасидан Яккабоғ тумани ИИБ ҳузуридаги тергов бўлинмаси томонидан  фуқаро Ю.Э., Ю.Б. ва бошқаларга нисбатан Жиноят Кодексининг 138-моддаси   2-қисми “а” банди билан  жиноят иши қўзғатилган.

 

Ҳозирда тергов ҳаракатлари олиб борилмоқда.

 

Маълумот ўрнида: Ушбу воқеа юзасидан Zamon.uz батафсил репортаж тайёрламоқда.