Хоразмда алимент тўламаган ота салкам бир йилга озодликдан маҳрум қилинди
У 13,3 млн сўм алимент пуллари тўлашдан қасддан бўйин товлаб келган.
Жиноят ишлари бўйича Шовот туман суди қарори билан алимент тўламагaн қарздор Х. Ю. 9 ой муддатга озодликдан маҳрум қилинди. Бу ҳақда Мажбурий ижро бюросининг расмий телеграм каналида хабар берилди.
Қайд этилишича, суд томонидан қарздор Х.Ю.дан ундирувчи Р. Р.нинг фойдасига уч нафар вояга етмаган фарзандларининг моддий таъминоти учун алимент ундириш белгиланган.
МИБ Шовот туман бўлими ходимлари томонидан алимент тўлаши юзасидан қарздор бир неча бор огоҳлантирилган бўлса-да, алимент пулларини ўз вақтида тўламасдан келганлиги сабабли суд томонидан унга нисбатан 15 сутка маъмурий қамоқ жазоси тайинланган. Шунга қарамасдан фуқаро 13 ой мобайнида 13,3 млн сўм алимент пуллари тўлашдан қасддан бўйин товлаб келган.
Шундан сўнг қарздорга нисбатан Жиноят кодексининг 122-моддаси 1-қисми билан жиноят иши қўзғатилган ва 9 ой муддатга озодликдан маҳрум қилиш жазоси тайинанган.
