Ўзбекистон ва Озарбайжон ишлаб чиқарувчилари кўргазмаси ўтказилади
Икки давлат ўртасида савдо-иқтисодий ҳамкорлик ва саноат кооперациясини чуқурлаштириш бўйича келишувга эришилди.
Ўзбекистон ва Озарбайжон қўшма инвестиция жамғармаси ташкил этиш, заргарлик фабрикаси ва ипак ишлаб чиқариш кластери қуришга келишиб олди. Бу ҳақда Ўзбекистонда амалий ташриф билан бўлган Озарбайжон Иқтисодиёт вазири Микайил Жабборов ва инвестициялар ва ташқи савдо вазири Жамшид Хўжаевнинг музокаралари якунларида маълум қилинди.
Хусусан, инвестициявий ҳамкорлик ва саноат кооперацияси муҳокамаси доирасида Бард шаҳри яқинидаги 6 та туманда кластерини ташкил қилиб, ипак ишлаб чиқаришни йўлга қўйиш, Евлах пилот агропарки ва Агдам саноат паркида янги лойиҳаларни ишлаб чиқиш бўйича қатор масалалар келишиб олинди. Шу билан бирга, Тошкент шаҳрида заргарлик буюмлари ишлаб чиқариш бўйича қўшма корхона ташкил этиш, кимё саноати, энергетика, нефть ва газ соҳаларида ҳамкорликни ривожлантириш каби қўшма лойиҳаларни амалга ошириш масалаларига алоҳида тўхталиб ўтилди.
Мазкур йўналишдаги амалий тадбирларни муҳокама қилиш жараёнида томонлар жорий йилнинг ноябрь ойида Тошкентда ҳудудларнинг биринчи форумини, шунингдек, Ўзбекистон ва Озарбайжоннинг турли вилоятларидаги ишлаб чиқарувчилар кўргазмасини ташкил этишга келишдилар.
Учрашув якунида икки томонлама ҳужжатлар тўпламини имзолаш маросими бўлиб ўтди.
