Шавкат Мирзиёев шу ҳафта Саудия Арабистонига боради
Бу охирги 30 йил ичида давлат раҳбарининг ушбу мамлакатга илк ташрифи бўлади.
Бу ҳақда Президент матбуот котиби Шерзод Асадов брифингда хабар берди, дея қайд этмоқда журналист Азиза Қурбонова.
17-18 август кунлари Шавкат Мирзиёев Саудия Арабистонида бўлади. Бу охирги 30 йил ичида давлат раҳбарининг ушбу мамлакатга илк ташрифи.
Шунингдек, ҳафта давомида Президент ҳузурида ижтимоий-иқтисодий масалалар юзасидан йиғилишлар ўтказилиши режалаштирилган.
Президентнинг тадбиркорлар билан мулоқоти 22 август куни ўтказилади.
Ўтган йили давлат раҳбарининг бизнес аҳли билан илк очиқ мулоқоти ўтказилиб, 20 август юртимизда Тадбиркорлар куни деб белгиланганди.
Жорий йилда ҳам давлатимиз раҳбари тадбиркорлар билан учрашиб, соҳадаги муаммо ва вазифаларни таҳлил қилади, бизнес вакилларининг таклиф ва ташаббуслари билан танишиб, янги ечимларни кўрсатади, тадбиркорлик ривожига хизмат қиладиган қарорларни қабул қилади.
Шерзод Асадовнинг маълум қилишича, бу йилги тадбирни 22 август куни ўтказиш мўлжалланган. Маълумот учун, бўлажак учрашувга тадбиркорлардан республика штабига қарийб 8,5 мингта мурожаат келиб тушган, уларнинг 72 фоизи ҳал этилган.
