Шавкат Мирзиёев Саудия Арабистони энергетика вазири бошчилигидаги делегацияни қабул қилди
Учрашувда икки мамлакат ўртасидаги инвестициявий ҳамкорликни ривожлантириш ва янги амалий лойиҳаларни ишлаб чиқиш масалалари кўриб чиқилди.
Шавкат Мирзиёев Анталия шаҳрида БМТнинг Иқлим ўзгариши бўйича конференцияси 31-сессияси (СОП31) доирасида Саудия Арабистони Подшоҳлигининг энергетика вазири, саноат ва минерал ресурслар вазири шаҳзода Абдулазиз бин Салмон Ол Сауд бошчилигидаги делегацияни қабул қилди.
Учрашув аввалида шаҳзода Абдулазиз бин Салмон Ол Сауд давлат раҳбарига Подшоҳ Салмон бин Абдулазиз Ол Сауд ва Валиаҳд, Бош вазир Муҳаммад бин Салмон Ол Сауднинг саломи ҳамда эзгу тилакларини етказди.
Мулоқот давомида Ўзбекистон ва Саудия Арабистони ўртасидаги кўп қиррали ҳамкорлик ва кенг кўламли шерикликни янада ривожлантириш масалалари муҳокама қилинди.
Сўнгги йилларда икки мамлакат ўртасидаги алоқалар жадал ривожланиб, йирик инвестиция лойиҳалари портфели шакллангани мамнуният билан қайд этилди. Ушбу лойиҳаларнинг асосий қисми «яшил» энергетика соҳасига тўғри келади.
Шунингдек, нефть-газ, нефть-кимё, тоғ-кон саноати ва бошқа устувор йўналишларда ҳамкорликни янги босқичга олиб чиқиш масалаларига алоҳида эътибор қаратилди. Томонлар ушбу соҳаларда аниқ амалий таклифларни ишлаб чиқиш муҳимлигини таъкидлади.
