Португалияда ЮНEСКОнинг Бутунжаҳон мероси рўйхатига киритилган боғ ёниб кетди
Талафот тахминан 15 минг гектар майдонни вайрон қилгани айтилмоқда.
Португалиянинг марказий қисмида 6 август куни содир бўлган ёнғин ЮНЕСКОнинг Бутунжаҳон мероси рўйхатига киритилган Серра-да-Эштрела боғидаги ноёб ўрмонни йўқ қилгани айтилмоқда.
Мамлакат ҳукумати маълумотларига кўра, талaфoт тахминан 15 минг гектар майдонни вайрон қилган бўлиб, бу Португалияда жорий йилнинг ёзида содир бўлган энг йирик ёнғин деб топилди.
Португалиядаги кенг кўламли ўрмон ёнғинлари ёнаётган жойдан 300 км узоқликда жойлашган Испания пойтахти – Мадридга ҳам ёнғин ҳиди етиб келди.
Йил бошидан буён 81 минг гектарга яқин майдон ёниб кетган, бу 2017 йилда юз берган ва 100 га яқин одам ҳалок бўлган ҳалокатли ёнғинлардан кейинги энг каттаси ҳисобланади. Бу табиат ва ўрмонларни муҳофаза қилиш институтининг сўнгги маълумотларида акс этган.
