Узоқ кутилган “Барон—2” премьера қилинди
Фильм ўта юқори 4К резолюцияда суратга олинган. Шунингдек, унда 5 та давлатдан энг таниқли актёрларни тўплаган.
Бугун, 18-август куни “Киночилар уйи”да “Барон–2:Соғинч” фильмига бағишланган матбуот анжумани бўлиб ўтди.
Унда Кинематография агентлиги раҳбарияти, фильмнинг продюсери ва суратга олиш гуруҳи қатнашиб, фильм яратилиши ҳақида маълумотлар берди.
Суратга олиш ишлари Ўзбекистон, Россия ва Туркияда олиб борилган. Ўзбекистон кино амалиётида биринчи марта лента рақамли ва уй кинотеатрлари учун юқори аниқликдаги тасвирларни тақдим этувчи ўта юқори 4К резолюцияда ишланган. У ўзбек разведкачиси мисолида махсус хизматлар вакиллари миссиясининг мураккаблиги ҳақида ҳикоя қилади.
“Бу фильм жуда-жуда узоқ кутилган. Уни яратиш йўлида режиссёр Рустам Сагдиев баъзи қийинчиликларга дуч келди, шу сабабли биз иккинчи продюсер излашга мажбур бўлдик. Биз Иван Архипов ва унинг “Инферно” продюсерлик марказидан жуда миннатдормиз, улар юқори иштиёқ билан лойиҳани ишлаб чиқариш ва сармоя киритишда ҳамкорлик қилдилар. Янги ғоялар пайдо бўлди, скрипт сезиларли даражада кенгайди. Яна бир ижобий томони шундаки, фильм 5 та давлатдан энг таниқли актёрларни тўплаган. “Барон-2” 18 август куни Россия кинотеатрларида намойиш этилади. Бу эса Янги Ўзбекистон киноси тарихида илк бор маҳаллий кинолойиҳа хорижий прокатдан тушган фойдадан ўз улушини олиши мумкинлигини англатади”, — дея изоҳ берди Ўзбекистон Кинематография агентлиги Бош директори Фирдавс Абдухолиқов.
“Ушбу фильм глобал ёвузлик – терроризмга қарши курашнинг ўта муҳим мавзусига бағишланган. Фильм кўпчиликнинг кўзини очишига ва балки кимнингдир ҳаётини сақлаб қолишига ишонаман”, - дейди продюсер Иван Архипов.
Рустам Сагдиевнинг маълум қилишича, “Барон–2” кинофильми ко-продукция форматида яратилган бўлиб, бу Кинематография агентлиги раҳбарияти томонидан жуда муҳим қадамдир. Россиялик ҳамкорлар билан имзоланган шартномага кўра, картина иккита мақомга эга бўлади - тўлиқ метражли фильм ва сериал мақоми.
Матбуот анжуманидан сўнг барча йиғилганлар “Барон–2:Соғинч”нинг ёпиқ премеьрасини томоша қилишган.
Эслатиб ўтамиз, “Ипак йўли дурдонаси” XIV Тошкент халқаро кинофестивали доирасида фильм катта экранларда намойиш этилади.
