Шавкат Мирзиёев Туркманистон ташқи ишлар вазирини мукофотлади
Шунингдек, Сердар Бердимуҳамедовнинг фармони билан Абдулазиз Комилов ва Владимир Норов ҳам орден билан тақдирланди.
Президентнинг тегишли фармони билан Туркманистон Вазирлар Маҳкамаси раисининг ўринбосари, ташқи ишлар вазири Рашид Мередов «Дўстлик» ордени билан тақдирланди. Бу ҳақда ТИВ матбуот хизмати хабар берди.
Мукофотни топшириш маросими Владимир Норов бошчилигидаги делегациянинг Ашхободга ташрифи доирасида бўлиб ўтган.
Мазкур орден Мередовга «Ўзбекистон ва Туркманистон ўртасидаги кўп асрлик дўстлик ва яхши қўшничилик ришталарини, стратегик шерикчилик ва кўп қиррали ҳамкорлик муносабатларини ривожлантириш ҳамда мустаҳкамлашга қўшган улкан шахсий ҳиссаси учун» берилган.
Шунингдек, Туркманистон президенти Сардор Бердимуҳамедовнинг фармони билан Ўзбекистон президенти ҳузуридаги Хавфсизлик кенгаши котиби ўринбосари, президентнинг ташқи сиёсат бўйича махсус вакили Абдулазиз Камилов ҳамда ташқи ишлар вазири вазифасини бажарувчи Владимир Норов Туркманистоннинг «Галкиниш» («Тикланиш») ордени билан тақдирланди.
