Тошкентнинг иккита туманида “свет” ўчиб қолди
Вазирлик электр таъминоти қачон тикланишини маълум қилди.
Тошкент шаҳрининг иккита туманида электр таъминотида узилиш кузатилмоқда. Бу ҳақда Энергетика вазирлиги матбуот хизмати хабар берди.
Қайд этилишича, бугун соат 21:10 да Тошкент шаҳрининг Яшнобод ва Миробод туманларининг айрим ҳудудларини электр энергияси билан таъминловчи юқори кучланишли 110 кВ тармоғида носозлик юзага келган. Бунинг натижасида Яшнобод туманининг Авиасозлар, “Ғалабанинг 40 йиллиги” массивлари, Мухтор Ашрафий кўчалари ва Миробод туманининг Фитрат, Янги Замон, Иноқобод, Файзобод, Эски Отчопар, Оқбилол кўчаларида электр таъминотида узилиш юз бермоқда.
Ҳозирда Энергетика вазирлиги, Тошкент шаҳар электр тармоқлари корхонаси мутахассислари томонидан носозликни бартараф этиш ишлари олиб борилмоқда. Таъмирлаш ишлари қисқа фурсатда (1,5 соатда) якунланади ва электр таъминоти қайта тикланади.
“Келтирилган ноқулайликлар учун истеъмолчилардан узр сўраймиз”, — дейилади хабарда.
Эслатиб ўтамиз, аввалроқ Энергетика вазирлиги байрам кунлари истеъмолчиларга энергия ресурслари барқарор етказиб берилишини маълум қилганди.
