Бўш турган биноларда мавжуд солиқ қарзи ҳисобдан чиқарилади
Президент қарори билан фойдаланилмаётган объектлар мулкдорларининг солиқ қарзини ундириш билан боғлиқ суд ва ижро ишлари тугатилади.
Фойдаланилмаётган объектларга нисбатан оширилган солиқлар натижасида ҳосил бўлган қарзлар ҳисобдан чиқарилди. Бу ҳақда президентнинг тегишли қарори қабул қилинди.
Унга кўра, фойдаланилмаётган объектлар мулкдорларига нисбатан оширилган ставкаларда қўлланилган таъсирчан солиқ механизми натижасида ҳосил бўлган мол-мулк солиғи ва ер солиғи бўйича:
мавжуд солиқ қарзи ҳисобдан чиқарилади;
солиқ қарзини ундириш билан боғлиқ суд ва ижро ишлари тугатилади.
2022 йил 1 июлдан мазкур Фармон кучга киргунга қадар бўлган даврда таъсирчан солиқ механизмини қўллаш натижасида ундирилган солиқ келгуси тўловлар ҳисобига мулкдорларга қайтарилади.
Эслатиб ўтамиз, 1 июлдан бўш турган бинолар, фойдаланилмаётган ишлаб чиқариш майдонлари, яшаш учун мўлжалланмаган иншоотлар, тугалланмаган қурилиш объектларига ва ушбу объектлар билан банд ерларга мол-мулк ва ер солиқларининг оширилган ставкаларини қўллаш, солиқ имтиёзлари ва преференцияларнинг амал қилишини тўхтатиш тартиби бекор қилинган.
