Ғарқ бўлаётган дунё шаҳарлари
2050 йилга бориб сайёрамизнинг 1 млрд аҳолиси дунё океани сатҳи кўтарилиши оқибатида доимий сув босиш хавфи остида яшаши мумкин.
Nature нашрининг ёзишича, бир гуруҳ олимлар ўтказган тадқиқот Жанубий ва Жануби-Шарқий Осиёдаги айрим шаҳарларда дунёнинг бошқа ерларидагига нисбатан сезилмасдан чўкиш жараёни анча тез кечаётганини кўрсатди.
Вьетнамнинг 9 млн киши яшовчи Ҳошимин (кино ва адабиётларда Сайгон номи остида машҳур) шаҳри дунёнинг қирғоқ бўйида жойлашган 48 та йирик шаҳри орасида энг тез чўкмоқда.
Бу рўйхатда Бангладешнинг Читтагонг порт-шаҳри иккинчи ўринни банд этди.
Сув босиш хавфи юқори йирик шаҳарлар бешлигида кейинги ўринларда: Аҳмадобод (Ҳиндистон), Жакарта (Индонезия пойтахти, бу мамлакат пойтахтни кўчириш тараддудида) ва Янгон (Мянма пойтахти).
БМТнинг Иқлим ўзгаришлари бўйича ҳукуматлараро экспертлар гуруҳи баёноти 2050 йилга бориб сайёрамизнинг 1 миллиард аҳолиси дунё океани сатҳи кўтарилиши оқибатида доимий сув босиши хавфи остида яшашини кўрсатди.
