Навоийдаги қамоқхонада маҳкум ўзини ўлдирди
Ҳозирда ҳолат бўйича суд-тиббиёт экспертизаси тайинланган.
Ижтимоий тармоқларда Навоий шаҳридаги 4-сон жазони ижро этиш колониясида маҳкум ваҳшийларча ўлдирилгани ҳақида хабар тарқалди. Ҳолат юзасидан вилоят прокуратураси расмий баёнот эълон қилди.
Маълум бўлишича, маҳкум М.О. 7 октябрь куни соат тахминан 01:35 ларда колония интизомий бўлинмасининг 2-ҳужрасида кийимдан арқон ясаб, ётиш учун мўлжалланган ўрин жойидаги кроват темирига ўзини осиб, жонига қасд қилган.
Маҳкум М.О. 2018 йил 30 июль куни жиноят ишлари бўйича Андижон вилояти суди томонидан Жиноят кодексининг 25,97-моддаси 2-қисми “л” банди, 60, 61-моддалари билан айбдор деб топилиб, 15 йил 1 ой муддатга озодликдан маҳрум қилиш жазоси тайинланган. Шунингдек, у Жиноят кодексининг бир нечта моддалари билан муқаддам 4 маротаба судланган.
Мазкур ҳолат юзасидан Навоий махсус прокуратураси томонидан терговга қадар текшириш ҳаракатлари олиб борилмоқда.
