Ўзбекистон ва АҚШлик олимлар янги пахта навини яратди
У вилт касаллигига чидамли экани айтилмоқда.
Ўзбекистонлик олимлар ва АҚШ тадқиқотчилари вилтга чидамли пахта навини яратишди. Бу ҳақда Инновацион ривожланиш вазирлиги Ахборот хизмати раҳбари Назокат Абдуқундузова хабар қилди.
Маълумотларга кўра, мазкур тадқиқотларда Ўзбекистон ФА Геномика ва биоинформатика маркази олимлари иштирок этган ва бу Америка ўсимликшунослик жамиятининг “Journal of Plant Registrations” илмий нашрида чоп этилган.
Тадқиқотчилар чатиштириш орқали пахтанинг янги линиялар гермплазмасини яратган. Гермплазма яна генетик ресурс ҳам деб аталади ва у селеционерларга қишлоқ хўжалиги экинлари навларини кенгайтиришга ёрдам беради.
Учта янги линия – PSSJ-FRP01, PSSJ-FRP02 va PSSJ-FRP03 – вилт касаллигига чидамлилигини намоён этган. Уларнинг ҳар бири турли характерга эга бўлишига қарамай, касалликка чидамлилиги ва тола сифатининг яхшилиги билан ажралиб туради.
Вилт замбуруғи одатда ўсимликнинг илдизига зарар етказиб, пояси ва баргларини қуритади, ҳосилни нобуд қилади. Мазкур янги линиялар генетик ресурс бўлиб, олимлар улардан янги нав олиш устида ҳам ишламоқда. Геномика ва биоинформатика маркази олимлари ҳозирда мазкур линиялардан олинган “Матонат” деб номланиши кутилаётган навни синовдан ўтказмоқда.
