Германия Евроиттифоқни кенгайтиришни таклиф қилди
“Иттифоқ ўз таъсирини янада кучайтириши керак”, — дейди Олаф Шольц.
Германия канцлери Олаф Шольц Евроиттифоқни кенгайтиришга чақириб, иттифоқ глобал масалаларда ўз таъсирини янада кучайтириши мумкинлигини айтди. Бу ҳақда “Reuters” нашри хабар бермоқда.
“Мен Европа Иттифоқининг кенгайиши ғоясини қўллаб-қувватлайман. Ташкилотнинг шарққа томон кенгайишда давом этаётгани барчамиз учун фойдалидир”, — деди Германия канцлери.
Европа Иттифоқи давлат ва ҳукумат раҳбарлари 23 июн куни Брюсселда бўлиб ўтган саммитда Украина ва Молдовага иттифоққа аъзо бўлиш учун номзод мақомини беришни маъқуллаганди. Қўшилиш бўйича музокараларни бошлаш учун давлатлар қатор шартларни, жумладан, ислоҳотларни бажариши керак.
Номзод мақомини олиш Европа Иттифоқига қўшилиш йўлидаги анча узоқ йўлнинг бошланиши ҳисобланади. Туркия 1999 йилдан, Шимолий Македония 2005 йилдан, Черногория 2010 йилдан, Сербия эса 2012 йилдан бери номзод. Хорватия 2013 йилда Европа Иттифоқига қўшилган охирги давлат бўлди, бу жараён ўн йил давом этган.
