Эҳтиёт бўлинг, сиз метродасиз

 

Метро, ишонч, хавфсизлик. Ҳар бир йўловчи метрода мана шу сифатлар мужассам дея ундан фойдаланади. Аммо сўнгги пайтларда метрода юришга ҳам одам қўрқиб қолди. Кузатилаётган носозликларни кети узилмаяпти. Ёзда вагонлар қизиб, гоҳо ёниб кетади, ёғингарчилик кузатилса, сув тошади.  Хуллас, ер остида воқеалар ривожи қизғин: вагонлар тез-тез “чарчаб қолиши”дан ташқари, йўловчилар сумкасидан “бомба” ҳам чиқиб туради. 

 

7 ноябрь куни Тошкент метрополитенининг “Чилонзор” йўналишида поезд носозлик сабаб янатўхтабқолди. Бу ҳақда “Тошкентметрополитени” ДУК маълум қилди. Соат 19:10 да “Чилонзор” йўналиши Сергели йўлининг 5-бекатида поезд ҳаракат йўлида техник носозлик ҳолати кузатилган, бунинг натижасида бекатда бўлган 17-сонли ҳаракат таркиби ҳаракатлана олмаган ҳамда ушбу йўлда йўловчилар ва ҳаракат хавфсизлигини таъминлаш мақсадида ҳаракат вақтинчалик тўхтатилган.

 

Ушбу вақт оралиғида “Буюк Ипак йўли” ҳамда “Олмазор” бекатлари оралиғида поездлар жадвал асосида ҳаракатланган. “Олмазор” ҳамда Сергели йўли 5-бекат оралиғида ушбу носозлик ҳолати тузатилгунга қадар бир томонлама ҳаракат амалга оширилган. Соат 19:37 да кузатилган носозлик мутахассислар томонидан бартараф этилган ва поездлар ҳаракатлана бошлаган.

 

Бундан ташқари, 16 ва 22 август, 25 сентябрь, 23 ҳамда 27 октябрь кунлари ҳам метродаги поездлар ҳаракат таркибида техник носозлик ҳолати кузатилган.

 

Ҳар сафар метро билан боғлиқ кўнгилсизликлар бўйича расмий муносабат билдираркан, “Тошкент метрополитени” ДУК ёки “Ўзбекистон темир йўллари” АЖ юзага келган ноқулайлик учун йўловчилардан узр сўраш билан кифояланади. Ҳатто ҳеч қандай узр сўралмайдиган кезлар ҳам учрайди. Аммо бу муаммонинг ечими бўлолмайди. Йўловчилар узрларни қабул қилавериб чарчади. Уларга техник носозликлардан xоли, хавфсиз ва ишончли йўл тармоғи керак.

 

Одатда, метрода юз берадиган фавқулодда ҳолатлар “техник-носозлик рўй бергани” билан изоҳланади. Нариборса, ҳодиса юзасидан хизмат текшируви тайинлангани,вазиятга ойдинлик киритиш учун ишчи гуруҳ ташкил этилгани айтилади. Бироқ хабарлар унут бўлгач, “техник-носозлик”ка нима сабаб бўлгани, келгусида бундай воқеалар такрорланмаслиги учун қандай ишлар қилиниши (қилинаётгани) ҳақида деярли расмий маълумот берилмайди. Менимча, хабарнинг “шапкаси”ни ўзгартириш вақти келди. 

 

Баҳринисо Мадумарова