Ўзбекистонда 2 та институт университетга айлантилди
2023 йилдан уларга молиявий мустақиллик берилади.
Архитектура-қурилиш соҳасидаги 2 та институт университет сифатида қайта ташкил этилиб, Олий ва ўрта махсус таълим вазирлиги тизимига ўтказилди. Бу ҳақда Олий ва ўрта махсус таълим вазирлиги хабар қилмоқда.
Қайд этилишича, 8-ноябр куни Архитектура-қурилиш соҳасида кадрлар тайёрлаш тизимини янада такомиллаштириш чора-тадбирлари тўғрисидаги Президент қарори қабул қилинган.
Қарорга кўра, Тошкент архитектура-қурилиш институти Тошкент архитектура-қурилиш университети сифатида қайта ташкил этилиб, у муҳандислик, архитектура, қурилиш ҳамда қурилиш материаллари технологиялари йўналишларига ихтисослаштирилди.
Мирзо Улуғбек номидаги Самарқанд давлат архитектура-қурилиш институти Мирзо Улуғбек номидаги Самарқанд давлат архитектура-қурилиш университети сифатида қайта ташкил этилиб, маданий мерос обектларини тиклаш, дизайн, архитектура, қурилиш, урбанизация ва муҳандислик йўналишларига ихтисослаштирилди.
Шунингдек, ушбу университетлар Олий ва ўрта махсус таълим вазирлиги тизимига ўтказилди.
Университетларда ўқув жараёнлари давлат, инглиз ва бошқа хорижий тилларда кредит-модул тизими асосида олиб борилади ҳамда илмий ва илмий-педагогик кадрлар тайёрлашни амалга оширишга йўналтирилган Олий илм-фан мактаби ташкил этилади.
Юқори курс талабалари ва магистрантлар иш ҳақи тўланадиган тизим орқали банд қилинади ҳамда улар республика ҳудудларида амалга оширилаётган қурилиш лойиҳаларига жалб этилади.
Университетларга илмий даража ва унвонлар берувчи Илмий кенгашлар тузиш ва уларнинг таркибини тасдиқлаш ҳуқуқи берилади.
2023 йил 1 январдан бошлаб Университетларга академик, ташкилий ва молиявий мустақиллик берилади.
Университетлар тузилмасида Стратегик ривожлантириш бўйича биринчи проректор лавозими жорий этилади.
2023-йил 1-мартга қадар бакалавриат таълим йўналишлари ва магистратура мутахассисликларини халқаро таълим ва касб классификаторларига мувофиқ мақбуллаштирилади.
Тошкент архитектура-қурилиш университети ҳузурида Технопарк, Самарқанд давлат архитектура-қурилиш университети ҳузурида Инкубация маркази ташкил этилади.
