Эрдоған ТДТ саммитида нималарни гапирди?
Президент 9 ойдан бери давом этиб келаётган Россия-Украина можаросига ҳам тўхталиб ўтди.
Туркия барча йўналишларда туркий давлатлар билан ҳамкорлик қилишга тайёр. Бу ҳақда мамлакат Президенти Ражаб Тойиб Эрдоған Самарқанддаги IX Туркий давлатлар ташкилоти саммитида гапирди.
Унинг сўзларига кўра, туркий давлатлар ташкилоти учун айни пайтдаги асосий йўналиш савдо-сотиқ, тарнспорт ва энергетика соҳаларидир.
"Мамлакатларимиз стратегик муҳим йўллар кесишмасида жойлашган, жумладан энергетика соҳасида ҳам. Баку-Тбилиси-Жайхун нефть ўтказгичи лойиҳаси глобал даражадаги энг муваффақиятли лойиҳалар қаторида туради. Биз ҳамкорликдаги энергетик лойиҳаларга алоҳида аҳамият берамиз", - деди Туркия етакчиси.
Шунингдек, мамлакат Президенти яқин вақт оралиғида Туркий инвестиция фонди тузишни тезлаштириш ва илм-фанда ҳамкорликни йўлга қўйишни таклиф қилди.
Жанубий Кавказдаги вазият ҳақида гапира туриб, Эрдоған Анқара биродар Озарбайжонни қўллаб-қувватлашини билдирди ва адолат учун курашда Бакунинг ёнида туришини айтди.
Ражаб Тойиб Эрдоған 9 ойдан бери давом этиб келаётган Россия-Украина можаросига ҳам тўхталиб ўтиб, Анқара адолатли тинчликка эришиш йўли билан ҳарбий ҳаракатларни тўхтатишга уринаётганини билдирди.
Туркия Президенти миграция инқирози масаласига алоҳида тўхталиб ўтди. Ўз сўзида у 2014 йилдан бери Туркия энг кўп мигрант қабул қилаётган давлат эканини такидлади.
"Ноқонуний миграция оқимларини тўхтатиш ва уни назорат қилишда халқаро ҳамкорлик муҳим деб ҳисоблаймиз" , - деди у.
