Қозоғистон Украинада сайлов участкасини очмайди
Қозоғистонликлар овоз бериш учун бошқа давлатларга бориши керак.
"Қозоғистон ҳукумати республикада ўтказиладиган президентлик сайловлари учун Украинада сайлов участкаларини очишни режалаштирмаяпти," — деб хабар берди мамлакат ТИВ вакили.
"Украинадаги вазият туфайли биз бу сафар сайлов участкасини очмадик. Шунинг учун фуқароларимиз хоҳласалар, қўшни давлатга - Молдова ёки Полшага бориб, у ерда овоз беришлари мумкин", - дейилади хабарда.
Қайд этилишича, қозоғистонликлар керакли миқдордаги сайлов бюллетенларини тайёрлаш учун ушбу давлатлардаги элчихоналарни олдиндан хабардор қилишлари керак.
20 ноябрь куни Қозоғистонда муддатидан олдин президентлик сайловлари бўлиб ўтади. Марказий сайлов комиссияси президентликка олти нафар номзодни, жумладан, амалдаги давлат раҳбари Қосим-Жомарт Тоқаевни рўйхатга олди.
