Жиззахда сифатсиз гўшт сақланаётган уй аниқланди
Хонадон эгаси уларни пуллаётган вақтида қўлга тушган.
Истеъмолга яроқсиз гўшт маҳсулотларининг сотувга қўйилишининг олди олинди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Зарбдор туман бўлими томонидан ИИБ ҳамда туман Ветеринария ва чорвачиликни ривожлантириш бўлими ходимлари билан ҳамкорликда тезкор тадбир ўтказилган. Унда фуқаро З.П. фуқаро Д.Д.га Жиззах шаҳар “Тошлоқ” МФЙ ҳудудидаги хонадонида истеъмолчилар ҳаёти ва соғлиги хавфсизлиги талабларига жавоб бермайдиган 201 кг йирик шохли мол гўштини 8,6 млн сўмга сотишга келишиб, шундан 6 млн сўмни олган вақтида ушланган. Фуқаронинг хонадони кўздан кечирилганда бирламчи ветеринария ҳужжатларига эга бўлмаган жами 73 дона қорамол туёғи ва 61,3 кг истеъмолга яроқсиз гўшт маҳсулотлари борлиги аниқланиб, ашёвий далил сифатида олинган.
Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.
