Қорақалпоғистондаги тартибсизликлар бўйича суд қачон бошланиши маълум бўлди
Аввалроқ мазкур воқеалар юзасидан мустақил текширув ўтказиш бошланганди.
Қорақалпоғистондаги тартибсизликлар бўйича суд жараёнлари эртага, 28 ноябрь куни бошланади. Бу ҳақда мустақил текширув ўтказиш бўйича комиссия маълум қилди.
Аввалроқ 16 июл кунидан Қорақалпоғистон Республикасида юз берган ҳолат ва воқеаларни ўрганиш ҳамда улар юзасидан мустақил текширув ўтказиш бўйича комиссия ўз ишини бошлагани хабар қилингади.
Комиссия инсон ҳуқуқ ва эркинликларини таъминлаш, воқеаларни ҳар томонлама ва ҳолис ўрганиш, шунингдек, олинган ахборотларни қайта текшириш ҳамда ўз фаолиятини жамоатчилик фикрини инобатга олган ҳолда ташкил қилишни асосий вазифаси сифатида белгилаган.
Шу кунга қадар Комиссия аъзолари таклифи ва Қорақалпоғистон Республикаси Жўқорғи Кенгеси илтимосномасига кўра, Бош прокуратура томонидан 107 нафар айбланувчи жамоат кафиллиги ва қамоқ эҳтиёт чораси инсонпарварлик тамойили асосида уй қамоғи тарзидаги эҳтиёт чорасига алмаштирилиши орқали ўз оиласи бағрига қайтарилган.
Тергов жараёнлари давомида айбланувчиларнинг сақлаш шароитлари, қийноққа солмаслик, адвокат билан таъминланганлик каби масалалар Мустақил комиссиянинг доимий назоратида бўлган. Комиссия аъзолари суд жараёнларида ҳам кузатувчи сифатида иштирок этишади.
