Сирдарёда фермер фуқарони 280 млнга чув туширди
Ҳозирда ҳолат юзасидан жиноят иши очилган.
Сирдарё туманида фуқаронинг 280 млн сўмини қўлга киритган фермер хўжалиги раҳбари аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Сирдарё туман бўлими томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилган. Унда “S.M.” фермер хўжалиги раҳбари Б.Ў. хўжаликнинг “Пахтачилик ва ғаллачилик” учун ажратилган 94,9 гектар ер майдонида шоли экиш ва ижарага беришга ваколати бўлмасада, алдов йўли билан ўзганинг мулкини қўлга киритиш мақсадида 60 гектар ер майдонини “Шоли” экиш учун фуқаро И.Д.га ижарага беришга келишиб, ёзма тилхат асосида 280 млн сўм нақд пулини олиб, ўзининг шахсий эҳтиёжлари учун ишлатиб юборганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
