Тошкент метросида поезд бир соатга тўхтаб қолгани айтилди
Ҳолатга расмийлар изоҳ берди.
Бугун, 4 декабрь куни Тошкент метросида поезд ҳаракати тўхтаб қолди. Ҳолат юзасидан “Тошкент метрополитени” ДУК расмий муносабат билдирди.
Қайд этилишича, соат 16:30 лар атрофида 37-сонли ҳаракат таркиби “Беруний” бекатига кириб келган ва йўловчиларни вагонларга чиқаргач, ҳаракатлана олмаган.
Йўловчилар оқими тирбандлиги ва йўналишдаги ҳаракат жадвалига таъсир кўрсатмаслиги учун машинист томонидан белгиланган йўриқномага асосан йўловчилар бекатга туширилган. Ҳаракат таркиби эса техник кўрикдан ўтказиш мақсадида текширув йўлагига юборилган.
Тезкор текширув ўтказилганда 37-сонли ҳаракат таркибининг 0003-сонли вагонида ҳаво босими миқдори нормал ҳолатда эмаслиги аниқланган ҳамда ҳаракат жадвалини бузилишини олдини олиш мақсадида 16:37 да мавжуд захира поезди йўлга чиқарилган. Ушбу поезд бекатдаги барча йўловчиларни олиб ҳаркатни давом эттирган.
Ҳозирда барча поездлар белгиланган жадвал асосида ҳаракатланмоқда.
