Ногиронлар уйидаги аҳвол: бўйнидан кишанланган шахс видеони ўзи саҳналаштирганми?
Самарқанд вилоят ИИБ ижтимоий тармоқларда тарқалган имконияти чекланган фуқаро видеоси юзасидан изоҳ берди.
Ижтимоий тармоқларда тарқалган Иштихон тумани Равот қишлоғида яшовчи фуқаро А.Ғ. бўйнида занжир билан боғлангани ҳолати юзасидан туман ИИБ томонидан терговга қадар текширув ҳаракатлари олиб борилган. Ҳолат 2022 йил 15 ноябрь куни содир бўлган.
Текширув давомида ушбу фуқародан мутахассис (сурдопедагог) иштирокида тушунтириш олинганда, у уйидаги рўзғор юмушларини бажармаслик учун ўзини-ўзи металл занжир билан боғлаб, қулф осиб, у билан бирга турувчи акаси (туғма ногирон (кар-соқов)) А.М.дан ушбу ҳолатни ижтимоий тармоқларга тарқатишини сўраб, шу йўл билан уй ишларидан қутилишни мақсад қилгани, ишидан пушаймонлиги, ҳеч кимга даъвоси йўқлигини баён қилган.
Фуқаронинг тоғаси Ж.А.дан тушунтириш олинганда, у жиянига нисбатан бу каби ҳаракатларни содир этмагани, ҳолатни ижтимоий тармоққа чиққанидан сўнг билганини баён қилган.
Фуқаро Иштихон тумани Тиббиёт бирлашмасида тиббий кўрикдан ўтказилганда, унинг танасида ҳеч қандай тан жароҳатлар аниқланмаган.
Тарафлардан тушунтиришлари ҳамда ҳолат ўрганилиб, ҳолат юзасидан жиноят ишини қўзғатишдан рад қилиш ҳақида қарор қабул қилинган.
