Гулистондаги озиқ-овқат омборида ёнғин чиқди
Ҳолат бўйича ФВВ маълумот берди.
Бугун, 10 декабрь куни Сирдарё вилоятининг Гулистон шаҳридаги омборхонада ёнғин чиқди. Ҳолат юзасидан Фавқулодда вазиятлар вазирлиги Матбуот хизмати расмий маълумот берди.
Қайд этилишича, соат 19:23 да Гулистон шаҳрининг 4-мавзесида жойлашган озиқ-овқат дўконининг омборхонасида ёнғин содир бўлаётганлиги тўғрисида вилоят ФВБга хабар келиб тушган. Шунга кўра, 2 та ёнғин-қутқарув экипажи соат 19:25 да воқеа жойига етиб бориб, ёнғин соат 19:27 да қуршаб олинган ва соат 19:30 да ўчирилган.
Ҳодиса оқибатида тан жароҳати олган ва ҳалок бўлганлар йўқ. Дўкон омборхонасининг таҳминан 30 квадрат метр майдонда том ва шифт қисми ёниб зарарланган.
Ҳозирда ёнғинни келиб чиқиш сабаби ва моддий зарар миқдори аниқланмоқда.
