Литва Беларусь билан чегарани видеокузатув билан таъминлайди
Ҳозирда икки давлат чегарасида баландлиги 4 метрлик панжара бор
Жорий йил охиригача Литва Белaрусь билан чегаранинг бутун периметри бўйлаб мобил воситалар ёрдамида видеокузатувни таъминлайди. Бу ҳақда Литва ички ишлар вазирлиги маълум қилди.
“Йил охирига қадар Беларусь билан чегаранинг 94 фоизи станционар видеокузатув тизимлари билан жиҳозланади. Қолган 6 фоизи — қарийб 40 километри мобил воситалар орқали чегарачилар ихтиёрида назорат қилинади”, — дейилади хабарда.
Беларусь билан чегарани 100 фоиз видео назорат билан жиҳозлаш режаси бутловчи қисмларни етказиб бериш билан боғлиқ вазият туфайли тўлиқ амалга оширилмайди. Жаҳон бозорларидаги вазият туфайли таъминот занжирлари узилди, шунинг учун қисман станционар эмас, балки мобил воситалардан фойдаланиш керак бўлади.
Литва–Беларусь чегарасининг узунлиги тахминан 680 км. Сув ҳавзаларидан ўтмайдиган жойларда тўсиқ қурилиб, у видеокузатув тизимлари билан жиҳозланган. Литва 4 метр баландликда металлдан ясалган, маҳкамланган панжара қурди, унинг устида тиканли сим ўрнатилган. Тўсиқ олдига баландлиги уч метр бўлган қўшимча тиканли сим бор.
