Bloomberg: Европа учун Россия газидан арзон газ йўқ
Москва ЕИ энергетика бозоридаги мавқеини тиклаши тахмин қилинди.
Россияда яна Европанинг энг йирик газ етказиб берувчисига айланиш имконияти бор. Бу ҳақда Bloomberg агентлиги таҳлилчиси Хавьер Блас тахмин қилди.
“Европа етакчилари Украина инқирозидан кейин одатий тартибга қайтмаслик ҳақида қанча ваъда бермасин, географик ва бозор реаллиги энг қатъиятли сиёсатчиларнинг ҳам фикрини ўзгартириши мумкин”, – деган эксперт.
У Саксония федерал ўлкаси бош вазири Михаэль Кречмернинг сўзларини мисол қилиб келтирган. Кречмер ўтган ойда “рус газидан воз кечиш —тарихни билмаслик ва геосиёсий хато” деб атаганди.
Бласнинг қайд этишича, ҳозирда Берлин 1 мегаватт соат газ учун 140 евро тўламоқда, бу 2014-2020 йилга шу кўрсаткичга нисбатан 7 баробарга кўп.
“Агар Евроиттифоқ кимё, озиқ-овқат ва оғир саноатда рақобатбардошлигини сақлаб қолишни истаса, унга арзон газ зарур. Европа учун Россия газидан арзон хомашё йўқ”, – деб таъкидлаган эксперт.
Украинада қуролли можаро бошлангач, Европа Россиядан газ сотиб олишни камайтирди. Кейинчалик етказиб бериш деярли тўхтаб қолди. Ҳозирда фақат Туркия ва Украина орқали кам миқдорда “мовий олов” етказиб берилмоқда.
