Тоқаев “Кўксарой”га дарахт экди
Давлат раҳбарларининг музокаралари эртага бўлиб ўтади.
Давлат ташрифи билан Ўзбекистонга келган Қозоғистон Президенти Қасим-Жомарт Тоқаев Президент Шавкат Мирзиёев ҳузурида “Кўксарой” қароргоҳининг Фахрий меҳмонлар хиёбонида дарахт экди.
“Маросим Ўзбекистон–Қозоғистон муносабатларида янги давр бошланаётгани, мамлакатлар ўртасидаги стратегик шериклик ва иттифоқчиликни қардош халқларимизнинг фаровонлиги йўлида янада мустаҳкамлашга қатъий интилишнинг ифодаси бўлди”, — дейилади Президент матбуот хизмати хабарида.
Қозоғистон етакчисининг мамлакатга давлат ташрифи асосий тадбирлари 22 декабрь куни бўлиб ўтади.
Қайд этилишича, эртага Олий даражадаги музокаралар бўлиб ўтади, уларнинг якунида тарихий аҳамиятга эга битимларнинг имзоланиши кутилмоқда. Биргаликда йирик инвестиция лойиҳаларини бошлаб бериш ва ОАВ вакиллари учун брифинг ўтказиш кўзда тутилган.
