Гулистондаги дорихонада тунда босқинчилик уюштирилгани айтилди
Дорихона сотувчисини номаълум шахслар машинага солиб олиб кетган.
Ижтимоий тармоқларда Сирдарё вилоятининг Гулистон шаҳрида жойлашган дорихонада босқинчилик юз бергани айтилган видео тарқалди. Ҳолатга вилоят ИИБ расмий муносабат билдирди.
Маълум бўлишича, фуқаро Д.Р. турмуш ўртоғига С.Т.нинг бетоблиги сабабли аёлларга керакли бўлган дорини дўстлари олдида сўрамаслик мақсадида сотувчи Ю.Т.га яқинроқ келишини талаб қилган. Шу вақтда улар ўзаро гап талашиб қолган ва натижада видеолавҳадаги ҳолат юз берган.
Мазкур ҳолат 26 декабрь куни соат 02:39 да 102 хизматига берилган хабарга асосан рўйхатга олинган ва Гулистон шаҳар ИИБ ходимлари томонидан воқеа иштирокчилари аниқланиб, қонуний тартибда ҳужжатлар расмийлаштирилган.
“Процессуал ҳаракатлар якунига кўра айбдорларга қонуний чора кўрилиб, қонун устуворлиги таъминланади”, — дейилади хабарда.
