Косонсойдаги уйда тунда эр-хотин ёниб кетди

 

Наманган вилоятида 31 декабрдан 1 январга ўтар кечаси 4 та ёнғин юз берди. Ҳолат бўйича вилоят Фавқулодда вазиятлар бошқармаси маълумот берди.

 

31 декабрь соат 22:15 да Чуст тумани “Лайлак уя” МФЙ ҳудудидаги хонадонларнинг бирида ёнғин содир бўлган. Ҳодиса оқибатида уйнинг ошхонасида шифт ва том қисмидан 15 квадрат метр жойи ёниб зарарланган.

 

1 январь соат 01:02 да Наманган тумани “Шўрқўрғон” МФЙ ҳудудидаги хонадонларнинг бирида ёнғин чиққан. Ҳодиса оқибатида бинонинг шифт ва том қисмидан 45 квадрат метр жойи ҳамда уй-рўзғор буюмлари ёниб зарарланган.

 

Соат 01:33 да Норин тумани “Хўжаобод” МФЙ ҳудудидаги хонадонларнинг бирида ёнғин юз берган. Ҳодиса оқибатида бинонинг шифт ва том қисмидан 40 квадрат метр жойи, уй-рўзғор буюмлари ҳамда хонадон эгаларига тегишли ҳужжатлар ёниб зарарланган.

 

Соат 05:00 да Косонсой тумани “Навбаҳор” МФЙ ҳудудидаги хонадонларнинг бирида ёнғин содир бўлган. Ҳодиса оқибатида бинонинг шифт ва том қисмидан 20 квадрат метр жойи, уй жиҳозлари ёниб зарарланган.

 

Ёнғин вақтида хонадон эгасининг ўғли —1994 йилда туғилган эркак ва унинг турмуш ўртоғи — 1995 йилда туғилган аёлнинг куйган холдаги жасади топилган.

 

Ҳозирда содир бўлган ёнғинлар юзасида терговга қадар суриштирув ишлари олиб борилмоқда.