23 ёшли талаба “Беш ташаббус” танлови ўтказаман деб бировнинг картасидаги пулларни ўзлаштирди
Ҳозирда унга нисбатан жиноят иши қўзғатилган.
Қашқадарёлик 23 ёшли талаба бухоролик шахсни чув туширди. Бу ҳақда Ички ишлар вазирлиги Киберхавфсизлик маркази хабар бермоқда.
Қайд этилишича, Бухоро вилоятининг Ғиждувон туманида истиқомат қилувчи 1987 йилда туғилган И.М. ариза билан мурожаат қилган. Telegram мессенжерида номаълум шахс унга “Беш ташаббус” кўрик танлови ўтказилаётганини ва ўзи ҳакамлар ҳайяти раҳбари эканлигини маълум қилиб, 3 млн сўм эвазига қимматбаҳо совға ютиб олиши мумкинлигига ишонтирган. Шундан сўнг И.М. пулларни банк картаси орқали ўтказиб берган ва у номаълум тарзда йўқолиб қолган.
Олиб борилган тезкор-қидирув тадбирларида фирибгарлик йўли билан пулларни ўзлаштирган шахс Қашқадарё вилоятининг Миришкор туманида яшовчи университет талабаси Қ.Х. эканлиги аниқланган.
Ҳозирда Қ.Х.га нисбатан Жиноят кодексининг 168-моддаси билан жиноят иши қўзғатилиб, тергов ҳаракатлари олиб борилмоқда.
