Mercedes-Benz бутун дунёда электромобилларни зарядлаш станцияларини очмоқчи
Шу мақсадда биргина Шимолий Америка давлатларига 1 миллиард доллар инвестиция киритиш режалаштирилган.
Германиянинг Mercedes-Benz автомобиль ишлаб чиқарувчиси бутун дунёда электромобилларни зарядлаш тармоғини ишга туширмоқчи. Бу ҳақда Heise online хабар берди.
Маълумотларга кўра, компания 2030 йилга қадар 10 мингдан ортиқ зарядлаш станцияларини ишга туширмоқчи. Уларнинг дастлабкилари йил давомида Шимолий Америкада пайдо бўлади. Эътиборли томони, ундан нафақат Mercedes-Benz автомобиллари, балки бошқа электромобиллар ҳам фойдаланиши мумкин.
“Биз уларнинг қурилишига қараб ўтирмаймиз. Ўзимиз тезкор зарядлаш тармоғини яратамиз”, – деган концерн раҳбари Ол Кэллениус.
Унинг сўзларига кўра, компания бунинг учун биргина Шимолий Америкага ўзида 1 миллиард доллар инвестиция киритади. 2027 йилгача АҚШ ва Канадада 2.5 минг зарядлаш қурилмасига эга 400 та станция очилади.
Ҳозирда ушбу тармоқларни яратиш бўйича Европа ва Хитойдаги ҳамкорлар билан музокаралар олиб борилмоқда.
