“Права” учун имтиҳонда “соққа” қилувчилар ушланди
Ҳозирда уларга нисбатан жиноят иши очилган.
Ҳайдовчилик гувоҳномаси олиб беришни ваъда қилган фирибгарлар ушланди, дея хабар бермоқда Бош прокуратура ҳузуридаги иқтисодий жиноятларга қарши курашиш департаменти.
Қайд этилишича, департаментнинг Бухоро вилояти Вобкент тумани бўлими ИИБ ходимлари билан ҳамкорликда тезкор тадбир ўтказган. Унда фуқаролар Ш.А., И.И. ва М.Р. фуқаро И.И.ни ҳайдовчилик гувоҳномаси олиши учун бўладиган имтиҳондан ўтказиб қўйиш эвазига 400 АҚШ долларини олган вақтларида ашёвий далиллар билан ушланган.
Қашқадарё вилояти Косон туманида ўтказилган терговга қадар текширувда фуқаро Н.Х. фуқаро А.П.ни ҳайдовчилик гувоҳномаси олиши учун бўладиган имтиҳондан гўёки Ички ишлар органларида ишловчи таниши ёрдамида ўтказиб қўйиш эвазига 2,2 млн сўмини қўлга киритганлиги аниқланиб, шундан 2 млн сўмни қайтарганлиги процессуал тартибда расмийлаштирилган.
Шунингдек, департаментнинг Қорақалпоғистон Республикаси бошқармаси томонидан ҳам тезкор тадбир ўтказилган. Унда фуқаро б.Ш. фуқаро С.К.ни ҳайдовчилик гувоҳномаси олиш учун бўладиган имтиҳондан танишлари ёрдамида ўтказиб қўйиш эвазига 2 млн сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
