Сирдарёда кўпкари учун совринга бўри қўйишмоқчи бўлди

 

Ижтимоий тармоқларда Сирдарёда ўтказиладиган кўпкари учун Зомин қўриқхонасидан бўри олиб келиниши ҳақида видеохабар тарқалди. Ҳолат юзасидан Табиат ресурслари вазирлиги расмий муносабат билдирди.

 

Сирдарё вилояти Экология бошқармаси ҳамда Ички ишлар  ходимларининг ўрганишларида видеотасвирдаги фуқаролардан бири Ховос туманининг «Истиқлол» МФЙда яшовчи фуқаро Ш.Р эканлиги аниқланган.

 

Ш.Р кўпкарига соврин учун бўри қўйишни мақсад қилгани, видеотасвирдаги ҳолат Жиззах вилоятининг Зомин туманида тасвирга олингани ва  бўри ушбу туманда яшовчи фуқаро E.A.ning уйида сақланаётганини билдирган. Ҳолат юзасидан белгиланган тартибда ҳужжатлар расмийлаштирилиб, Жиззах вилояти Экология  ва Ички ишлар бошқармалари ходимларига тегишли маълумотлар тақдим қилинган.

 

Шундан сўнг Зомин тумани Экология бўлими ва ички ишлар ходимлари томонидан олиб борилган ўрганишлар давомида «Туркман» МФЙда яшовчи К.Ғ. исмли фуқаро ўз хонадонида бўрини ноқонуний тарзда тутқунликда сақлаб келаётганлиги аниқланган. Ушбу  фуқаро бу ҳаракати билан Ўзбекистон Республикасининг “Ҳайвонот дунёсини муҳофаза қилиш ва ундан фойдаланиш тўғрисида”ги Қонунининг 4, 32, 33-моддалари  талабларини бузган.

 

Мазкур фуқарога нисбатан Ўзбекистон Республикаси МЖтКнинг 90-моддаси, 1-бандига асосан БҲМнинг 10 баравари — 3 млн сўм миқдорида жарима белгиланган.

 

“Давлат инспекторлари томонидан бўрининг ҳолати кўздан кечирилганда жонивор соғлом эканлиги маълум бўлди. Шундан сўнг  бўри табиат бағрига қўйиб юборилди”, — дейилади хабарда.