Талабалар учун янги давлат стипендияси таъсис этилади
У 2023/2024 ўқув йилидан бошлаб берилади.
Тарих ва география йўналишларида Заҳириддин Муҳаммад Бобур номидаги давлат стипендияси таъсис этилади. Бу ҳақда “Ҳуқуқий ахборот” Телеграм каналида хабар берилди.
Қайд этилишича, кеча, 25 январь куни “Буюк шоир ва олим, машҳур давлат арбобиЗаҳириддин Муҳаммад Бобур таваллудининг 540 йиллигини кенг нишонлаш тўғрисида” и Президент қарори қабул қилинган.
Қарорга кўра, “Заҳириддин Муҳаммад Бобур меросининг Шарқ давлатчилиги ва маданияти ривожида тутган ўрни” мавзусида халқаро илмий-назарий анжуман ўтказилади. “Бобур мероси” халқаро сайёҳлик тарғибот дастури амалга оширилади.
Заҳириддин Муҳаммад Бобурнинг болалик даврига бағишлаб суратга олинаётган “Йўлбарснинг туғилиши” бадиий фильмини якунига етказиш чоралари кўрилади.
Шунингдек, қуйидагилар чоп этилади:
—ўзбек, рус ва инглиз тилларида Заҳириддин Муҳаммад Бобур ҳаёти ва ижодига доир “Бобур энциклопедияси”Нинг тўлдирилган учинчи нашри;
—“Бобур” китоб-альбоми;
—Бобур асарлари луғати;
—Бобур девонининг мукаммал нашри.
2023/2024 ўқув йилидан ОТМ талабалари учун тарих ва география йўналишларида Заҳириддин Муҳаммад Бобур номидаги давлат стипендияси таъсис этилади.
2023 йил 1 августгача ўзбек, рус, инглиз тилларида фаолият юритадиган халқаро илмий бобуршунослик электрон платформаси ва унинг мобиль иловаси яратилади.
