2 та вилоятда фермер ерлари ўзбошимчалик билан эгаллаб олинди
Бирида уй, бирида чорвага мўлжалланган бино қурилган.
Фермер хўжаликлари экин ер майдонларини эгаллаб олиш ҳолатлари аниқланди, дея хабар бермоқда Бош прокуратура ҳузуридаги ИқтисодиЙ жиноятларга қарши курашиши департаменти.
Қайд этилишича, департаментнинг Музработ туман бўлими томонидан терговга қадар текширув ўтказилган. Унда фуқаро Н.А. “Ф.Х.” фермер хўжалигининг суғориладиган экин ер майдонининг 20 сотихини ўзбошимчалик билан эгаллаб олиб, жами 98 квадрат метр сувли ер майдонида 5 хонали уй-жой қурилишини амалга ошираётгани аниқланган.
Шунингдек, департаментнинг Шофиркон туман бўлими томонидан ўтказилган терговга қадар текширувда фуқаро М.О. “R.J.” фермер хўжалигига қарашли юқори бонитетли суғориладиган ер майдонининг 7 сотихини ўзбошимчалик билан эгаллаб олиб, ернинг унумдор қатламига зарар етказган ҳолда чорвага мўлжалланган бино қурганлиги аниқланган.
Мазкур ҳолатлар юзасидан Жиноят кодексининг 229-1-моддаси (ер участкаларини ўзбошимчалик билан эгаллаб олиш) билан жиноят ишлари қўзғатилиб, тергов ҳаракатлари ўтказилмоқда.
