Ҳисоблагичларда носозлик бўлса, уларни таъмирлаш харажатларини ким қоплайди?
"Ўзсувтаъминот" АЖ айрим ОАВ ва ижтимоий тармоқларда тарқалаётган нотўғри талқинларга муносабат билдирди.
Шу кунларда айрим оммавий ахборот воситалари ва ижтимоий тармоқ фаоллари томонидан ичимлик суви ҳисоблагичларида носозлик аниқланганда уларни таъмирлаш ёки янгисига алмаштириш билан боғлиқ харажатлар ким томонидан қопланишига оид тартиб нотўғри талқин қилинаётгани кузатилмоқда. "Ўзсувтаъминот" АЖ Ахборот хизмати маълумот тақдим этди.
Унга кўра, сув таъминоти ташкилотлари сув ҳисоблагичини даврий текширувдан ўтказишнинг амал қилиш муддати тугашидан 30 кун олдин истеъмолчини сув ҳисоблагичини даврий текширувдан ўтказиш зарурлиги ҳақида ёзма равишда огоҳлантиради. Сув ҳисоблагичини даврий текширувдан ўтказиш жараёнида сув ҳисоблагичида носозлик аниқланганида, ҳисоблагични таъмирлаш ёки янгисига алмаштириш таъминотчи корхона ҳисобидан амалга оширилади.
Шу билан бирга, 2023 йил 1 январдан бошлаб, аҳоли истеъмолчилари учун шу муддатдан кейин қиёслаш муддати тугаган сув ҳисоблагичларини янгисига алмаштириш сув таъминоти корхоналари маблағлари ҳисобидан амалга оширилади.
Юқорида назарда тутилмаган бошқа ҳолатларда сув ҳисоблагичини таъмирлаш ёки янгисига алмаштириш билан боғлиқ барча харажатлар истеъмолчи томонидан қопланади.
