ТДТУ талабаси озодликдан маҳрум қилинди
У Телеграмда диний қўшиқ юклаб олиб, бошқаларга тарқатган.
Тошкент давлат техника университетининг 4-курс талабаси озодликдан маҳрум қилинди. Бу ҳақда Тошкент шаҳар судлари хабар берди.
30 январь куни жиноят ишлари бўйича Олмазор туман судининг очиқ суд мажлисида Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг “Г” банди айбланган С. Р.га оид жиноят иши кўриб чиқилган.
Маълум бўлишича, С. Р. динга бўлган қизиқишлари замирида ўзи фойдаланган телефон аппаратининг Телеграм иловасидаги саҳифаси орқали “VK music bot” орқали кўчириб олинган ақидапарастлик ғоялари билан йўғирилган аудиоқўшиқ (нашида)ни танишига тарқатиш мақсадида юбориб, интернет жаҳон ахборот тармоғидан фойдаланиб тарқатган.
Вазирлар Маҳкамаси ҳузуридаги Дин ишлари бўйича қўмита хулосасига кўра, С. Р. тарқатган диний қўшиқ (нашида) ақидапарастлик ғояси билан йўғрилган бўлиб, бу каби диний материални Ўзбекистон ҳудудига олиб кириш, тайёрлаш ва тарқатиш тақиқланганлиги кўрсатилган.
Судланувчи суд мажлисида дастлабки тергов жараёнида қийноққа солинганлиги ҳақида кўрсатма бермаган ва важлар келтирмаган.
Жиноят кодексининг 244-1-моддаси 3-қисмида назарда тутилган жиноятни содир этганлик учун қонунда 5 йилдан 8 йилгача озодликдан маҳрум қилиш жазоси белгиланган. С. Р.га нисбатан Жиноят кодексининг 57-моддасини қўллаб, модда санкциясида назарда тутилган жазодан ҳам камроқ жазо тайинлаш учун асослар етарли бўлмаган.
“Давлат айбловчисининг музокара нутқида қанча жазо муддати ёки қандай жазо тури сўраганлиги айбдор шахсга жазо тайинлашда муҳим омил ҳисобланмайди.
Биринчи инстанция судининг ҳукми қонуний кучга кирмаган бўлиб, ушбу ҳукмдан норози бўлган тақдирда апелляция шикояти (протести) қонунчиликда белгиланган тартиб ва муддатда берилиши мумкин”, — дейилади хабарда.
