Германия Россиянинг айбини исботлай олмаяпти
Гап “Шимолий оқим” газ қувурининг портлаши ҳақида кетмоқда.
Германия бош прокурори Петер Франкнинг айтишича, ҳозирда немис терговчиларида “Шимолий оқим” ва “Шимолий оқим—2” газ қувурларидаги портлашлар ортида Россия турганига оид ҳеч қандай далил йўқ.
“Ҳозирда буни исботлашнинг иложи йўқ, тергов давом этмоқда”, — деди Франк.
Унинг сўзларига кўра, иккита тадқиқот кемаси ёрдамида сув ва тупроқ намуналари, шунингдек, Дания ва Швециянинг эксклюзив иқтисодий зоналарида жойлашган тегишли портлаш жойларидан қувурлар қолдиқлари олинган.
“Биз ҳозирда буларнинг барчасини суд-тиббиёт экспертизаси нуқтайи назаридан баҳолаяпмиз”, — дея таъкидлади Германия бош прокурори.
Шу билан бирга, у Дания ва Швеция ҳодиса юзасидан ўз текширувларини олиб бораётганини эслатди.
Аввалроқ Германия канцлери Олаф Шольц Германия “Шимолий оқим” ва “Шимолий оқим—2” газ қувурларидаги қўпорувчилик мавзусида далилсиз спекуляция қилиш ниятида эмаслигини маълум қилганди.
2022 йил 27 сентябрда Nord Stream “Шимолий оқим” ва “Шимолий оқим—2” денгиз газ қувурларининг учта тармоғида “мисли кўрилмаган вайронагарчилик” юз берганини эълон қилди. Швециялик сейсмологлар 26 сентябрь куни қувур йўллари бўйлаб иккита портлашни қайд этди. Россия Федерацияси Бош прокуратураси газ қувурларига шикаст етказилганидан кейин халқаро террорчилик акти бўйича иш қўзғатди.
