Ўзбекистон энергетика вазири газ масаласида Санкт-Петербургга борди
У ерда «Газпром» раиси билан учрашув ўтказилган.
Бугун, 9 февраль куни Санкт-Петербург шаҳрида Ўзбекистон Республикаси Энергетика вазири Ж. Мирзамаҳмудов, «Газпром» ОАЖ бошқарув раиси А. Миллер ҳамда Қозоғистон Республикаси Энергетика вазири Б. Акчулаков иштирокида уч томонлама учрашув бўлиб ўтди.
Учрашувда Ўзбекистонга Россия табиий газини Қозоғистон Республикаси ҳудуди орқали етказиб бериш масаласи, хусусан, уч томонлама ишчи гуруҳ томонидан ўтказилган дастлабки техник кўрик натижалари, етказиб беришнинг мавжуд имкониятлари ҳамда жорий йил январь ойида имзоланган “йўл харитаси”Нинг ижроси юзасидан муҳокамалар ўтказилди.
Мазкур учрашув якуни билан уч томонлама ўрганишларнинг кейинги босқичини жадаллаштириш ҳамда натижаси бўйича қисқа муддатларда уч томонлама учрашувни қайта ташкил этишга келишиб олинган.
