Қашқадарёда фуқаролар сайловни бузмоқчи бўлди
Улар блогерларни ёллаб, жанжал уюштирган.
Қашқадарё вилоятининг Кўкдала туманида айрим фуқаролар жанжал уюштириб, сайлов тадбирини бузишмоқчи бўлди. Бу ҳақда ИИВ ахборот хизмати раҳбари Шоҳруҳ Ғиёсов хабар бермоқда.
Маълум қилинишича, Кўкдала тумани Чорвадор маҳалласида раисни сайлаш тадбирига сайланувчилар рўйхатига тушмаган ва бундан норози айрим фуқаролар “Элпарвар" блогерларини ёллаб, жанжал уюштириш орқали тадбирни бузмоқчи бўлаётгани ҳақида маълумот келган.
“Огоҳлантирамиз, жамоат тартибини бузишга қаратилган ҳар қандай кўринишдаги ҳаракатларга нисбатан кескин чора кўрилади. Ғайриҳуқуқий манфаатларни кўзлаб, жамоатчилик назоратини суиистеъмол қилишга йўл қўйилмайди”, — дейилади хабарда.
