Туркиядаги зилзила қурбонлари сони 35 400 кишидан ошди
Жабрланганларнинг 13 минг 208 нафари шифохоналарда даволанмоқда.
Туркия жанубида содир бўлган даҳшатли зилзила қурбонлари сони 35 418 нафарга етди. Бу ҳақда Туркия Президенти Режеп Таййип Эрдоған республика Вазирлар Маҳкамаси йиғилиши якунлари бўйича ўз мурожаатида маълум қилди, дея хабар бермоқда Анадолу агентлиги.
Йиғилиш Туркия Фавқулодда вазиятлар бошқармасининг Анқарадаги бош қароргоҳида бўлиб ўтди.
Давлат раҳбарининг сўзларига кўра, жабрланганларнинг 13 минг 208 нафари шифохоналарда даволанмоқда.
Туркия раҳбари, шунингдек, дунёнинг турли бурчакларидан келган мутахассислар Туркиядаги зилзилани «ўзгача табиат ҳодисаси» деб атаганини эслатиб ўтди.
Президент Эрдоғаннинг маълум қилишича, табиий офат ҳудудида қидирув-қутқарув ва бошқа ишларга 250 мингга яқин давлат хизматчиси жалб қилинган.
Унинг қайд этишича, зилзиладан вайрон бўлган ҳудудларда қидирув-қутқарув ишлари омон қолганлар вайроналар остидан олиб чиқилгунга қадар давом этади.
Давлат раҳбарининг сўзларига кўра, келаси ой Туркия ҳукумати зилзила қурбонлари учун 30 мингта уй қуришни бошлайди. Ҳозирда 1,6 миллион киши бошпанага муҳтож.
«Табий офат содир бўлган ҳудудда 175 минг чодир ва 5 минг 400 контейнер типидаги уйлар ўрнатилди», — деди Эрдоған.
